admin
ماكاين مايدار قلت اللهم ندخل نضرب دورة نشوف شعب الفايسبوك كي داير و كي دايرة احوالو . نشوف واش كاين شي بندير كاين شي تطبال ولا والو . المهم طالع هابط فالفايسبوك باغي نكومونطي هنا و نجمجم هنا ولكن قبل ماندير اي حاجة تلاقيت هاذ الفايسبوك ولا اير بحال ديك البايرة الي عايشة على الماضي غي فاتها قطار الزواج و بقات عايشة فالماضي هدرة جوج تقولك خطبني بيلوط ايام زمان و رفضتو يا ودي نعلي الشيطان كون خطبك بوعو كون قبلتي بيه. الحاصول الفايس بوك غي تتلفلو يفكرك بشي حاجة كتبتها هاذي قرن و زمارة و باش يفقسك يقولك واش عقلت هاذي راك كتبتها فعام السكر لحمر يا ودي انا راه واشتا كليت البارح والله ماعاقل عليه و فين نعقل على واشوا قلت هاذي شحال من عام.القضية الزينة فهاذ الشي كامل انه يفكرك فشي حوايج و فشي ناس درك مين تشوفهم الشيطان و يحشم و حتى نبغي نپارتاجي داك الشي و نحشم فبلاصة الشيطان و نبغي نلعنو و لكن نتلاقاه ماشي هو اللي كان يطبل و يبندر و نديى عين ميكة.و انا ندور طلعتلي تدوينة يعلك الله شحال باللي كتبتها و موراخا طلعلي باللي بلعو واحد المعلمة تاريخية ندارت فبركان و من كثرة ما طبلولها يحسابلي انه في ظرف عام ولا عامين غادي موليو بحال سيليكون ڤالي و لكن ياحسراه ماكان لا ذكاء اصطناعي لا غباء طبيعي لا ستة حمص كاين فلوس الشعب مشات، و البقرة ضربت و لعجل داه مولاه و حنا بقيني لا ديدي لا حب لملوك، و دوك الطبالة والغياطة ضربو الطم و سكتو بحالهم بحال اهل الكهف مين كانو ناعسين. المشكل علاش درك مايخرجوش و يقولو باللي كنا غالطين ولا زعما عندهم لوجه اللي يبان؟؟ ؟الكارثة درك فين ما ندور نلقاهم بحال شي گوبة لاصقة فلوجه، الله يرحمك يا جداتي #العالية : كي نديرلك يا گوبة وجهي ايلا حكيتك سال دمي و ايلا خليتك طال همي.الحاصول راه خلاوها الصينيين متورخة : الزين يحشم على زينو و لمبهدل الله يزيدلو فالتبهديل
.#عمي_بوجمعة
