مدير فالظلام و الصالير فالتمام

تلفتلي و مالقيت ماندير ،ضربت الراي فالراي و انا نمشي للقهوة و مع التلفة كرهت نجلس مع شي قمقوم يهرسلي الراس بلفهامة الخاوية ، اللهم نفهم على راسي و نهرس راسي راسي احسن مايهرسلي راسي شي واحد بلخوا الخاوي . المهم جلست انا و راسي دومانديت نورمال لراسي و راسي يدبر لراسو يشوف واشتا يشرب. ولا يعاود لمخو شغلو هذاك . المهم و انا نختش فالفايس بوك و هو يفكرني بواحد التخربيقة كتابتها شحال هاذي ايام ما كانت النية و الواحد عندو الگانة يكتب و يعبر و يحاول انه يدعو لتغيير العقلية و لكن واش خلاونا الطبالة و الغياطة و اللي كان الدور ديالهم كامل انهم يهزو البندير و يطبلو مور ولي نعمتهم . تفكرت نهار كتبت على الاغنية ديال الشاب رضا الطالياني : خبز الدار ياكلو البراني ، غادي يجي شي دادَّا الفاهيم و يقولي و هاذ الشي كامل علاش ،يا ودي راني قلتلك راها تالفالي ومالقيت مانير نهبل بوحدي اللهم نهبل شي بعضين معايا و نمشي ننعس و انا ضميري معذبني انني خليتهم يتفتفو و يشوفو علاش راني نكتب هاذ الشي احسنو ما نبات انا مديرونجي و هوما ينعسو هانيين . المهم قالك ما قالك حقا ما حقا ديك شركة التنمية المحلية مجال بركان بلعوها و جراو على الموظفين كاملين و لكن باقي المدير و الطامة الكبرى انه باقي يخلص و مبلغ معتبااااااار شي ربع ملاين و مي&ين و خمسين الف و الاشكالية انه باقي يمشي للبيرو ديالو فالشركة و اللي للاشارة مافيهاش الضو علامن راه يتمودر و واشتا راه يخدم اودي الله اعلم . ماشي يحبسلك المخ ؟؟؟؟السؤال اللي يطرح راسو براسو شنو قدمت هاذ مجال بركان للمجتمع و شنو الاضافة اللي عطات للمدينة و فين هي ديك المشاريع العملاقة اللي قدموها لينا المسؤولين ديالنا رضي الله عليهم ؟فين هي ديك الجوائز العالمية اللي هرسو لينا الراس بيها و شنو قدمت للمدينة كإضافة ؟ اللهم خرجو على الميزانية ديال لمدينة و سمنو الصاليرات للمادرية و ماعمرني شفت شركة لمادرية فيها اكثر من اللي يخدمو . و ماعمرني شفت مدير يتمودر على الجنون . و فين راهم دوك اللي كانو متبعين الشاف لكبير بالبندير و الزامر و اي حاجة يرحعوها انجاز خارق للعادة و مامنوش جوج ؟؟؟ الحاصول الواحد يشوف حتى يعيا و فالتالي يرمش #عمي_بوجمعة