admin
البارح مين كتبت المقولة اليابانية اللي تقول ماصو مغنية يبني الصباح يهدم لعشية صيفطتها لواحد الصديق زعما كي الناس باش يعطيني الرأي ديالو كأيها الناس و لكن بحال يالا زعما حنا ماقاريينش و مانعرفوش نفرقو بين الامثلة اليابانية و اللي من قيرغيزيستان و طاجيكستان و زيد وزيد . راه ماكانش ما اسهل انك تلعبها مثقف و هي الساهلة . اي حاجة باغي تطلعها صحيحة سبقلها كلمة واحد الدراسة ولا كلمة اكد واحد المجموعة من الباحثين و هانتا وليت مثقف و ماكانش اللي يدور موراك .
و مالنا حنا زعما باش فايتينا گاع هاذو اللي راهم كاينين فالساحة ؟؟؟
الهدرة اللولة قالي واش كاين شي حاجة سميتها ماصو مغنية فاليابان؟قلتلو و كاين شي حاجة سميتها المدينة الذكية فالمغرب؟؟؟ فبهت الذي طبل للمسؤولين .
المشكل مع الشعب اللي عندو المخ فيه البطون انك صعيب تحيدلو الدراگيات اللي دايرهم على عينيه . و ساهل تندهو بحال حمار الشيخ اللي وقف في العقبة .
المشكل هاذ الصديق اللي جا ينتاقدني على ماصو مغنية باليابانية هو نفسو مقتانع باللي بركان مدينة ذكية ، و كيما بركان ولات مدينة ذكية و هي گاع مزبلة و محفرة و الاشغال ديالها مابغاتش تكمل راه حتى مغنية يابانية و نزيدك من الشعر بيت سميتها مغنية اوزوماكي ايوا حيدهالي من الفم ياله ؟؟؟؟
صديقي #العربي من كثرة الاقتناع ديالو بالفكرة ديالو حاول انه يقنعني ان بركان كانت في بلاصة و رجعت فبلاصة اخرى من خلال المشاريع العملاقة اللي نطالقت فيها ولا ادل على ذلك الشركة العالمية ديال التنمية المحلية واللي غيرت وجه المدينة من الى و السلام عليكم . كي تدير تقنعو بشي حاجة عندو مسلمة من المسلمات . هو يقول و انا نقول و فالتالي ختمتهالو بالمقولة ديال #الجيلالي_جاليليو :” ومع ذلك فهي غارقة و ماتزيدش تناقشني و السلام
#عمي_بوجمعة
