adminنعقل على واحد الرواية قريتها مين كنت عاد نقرا ديال واحد الروائي سوداني سميتو الطيب صالح الله يرحمو . سميتها موسم الهجرة الى الشمال .فالحققيقة ما بقيتش عاقل علامن تهدر. و لكن الاسم ديالها باقي لاصق فلعقل ديالي واخا فاتت على القراءة ديالها اكثر من ربع قرن .
علاش هاذ الفيلم كامل و هاذ المقدمة الطللية و واشتا باغي نقول من هاذ الشي كامل ؟؟
مدة ما كعررت ولا دخلت فشي جدل بيزنطي مع كائن من كان . ماشي خوف من شي حد ولا شي حاجة ولكن مابقاتش الكانة ديال التكعرير و كثرة الكلام .
هاذ ليامات دخلت للفايس بوك و تلاقيت بحال ايلا راحنا فشي حمام كلها. يلغي بلغاه و كلها و فين شاد الستون . تفكرت الرواية ديال الطيب صالح الله يرحمو .و تلاقيت ان اصدق عنوان نقدر نقولو هو موسم الهجرة الى التركتور.
ماعرفتش علاش كلشي عندنا يولي محلل سياسي بمجرد حادثة سياسية و لا شي حدث رياضي و لا اي قرينة كحلة . فلبلاص كلشي تلقاه ولا محلل.
ياك الانتخابات هاذي ايوا ضرب دورة فالفايس بوك مثلا. تلقا كلشي رجع من اكبر المحللين السياسين و يقدر يعطيك حتى العدد ديال الاصوات اللي غادي يجيب اي مرشح. و شكون اللي راك مكاليفي و شكون اللي عندو الباراج و شكون غادي يطيح للدوزيام ديفيزين و الهواة .و اللي عجبني هو الفيلم ديال الحصيلة ديال خمس سنين تحت قبة بر الامان . و هاذي بذاتها فيلم اخر ماشي غي رواح و دير الحصيلة .الحاصول تعيا تشوف فالتالي تقول استغفر الله و الحمد لله و انا اليه راجعون
