عمي بوجمعة
مناضلتي و قرة عيني لالة الضاوية بنت العربي قدس الله سرها. و اطال عمرها هاذ ليام ولات مشغولة بزاف.
ماشي حيث كثرة عليها اشغال الدار و تمارة و انما ولات محللة سياسية من الطراز الرفيع.
الرفيع ماشي الممتاز، و انما الرفيع اللي هو رقيق بزاف اللي مايتشافش. الضاوية فينما كاين شي تحليل سياسي على الحكومة المغربية نلقاها حال التيليفون. و تتفرج و تعطي الرأي ديالها بحال ايلا تقول هاذي فين قارية .
غي هدرة جوج تقولي النسا وصلو لرئاسة الحكومة . النسا راهم دخلو للبرلمان و زيد و زيد .
و الكارثة تبانلي هاذ ليامات ماعاجبنيش الحال . غي سمعت على المدونة و التعديلات ديالها و هي تبدل معايا الهدرة 180 درجة . بحال ايلا ماعمري عرفتها. حتى دوك الشعارات ديال لمرا وصلت لرئاسة الحكومة و البرلمان مابقاتش تجبدها .
و لات الهدرة اللولة اللي نهدر معاها تقولي الله يعز القانون و المدونة. زعما واشتا باغية تقصد بهاذ الشي؟؟؟؟؟؟
هاذ الشي فكرني بخالي قويدر اللي نهار زغبو الله و بغا يدي المدام ديالو للخاريج فين كان خدام .
غي وصلت لباري و هي تدير سجود الشكر و قالت المقولة ديالها الشهيرة : الحمد لله اللي وصلنل فين يحكمو النسا. خالي قويدر ماكان من العاكزين قالها باقي ماوصلنا خاصنا نجيزو طياة اخرى .
لمرا مين وصلو لمطار انجاد شافت خالي قويدر دار قيام الليل بالنهار على ارضية المطار قالتلو ياك لاباس تبانلي كثرة من الركوع و السجود . قاللها الحمد لله مين وصلت فين يحكمو الرجال.
الحاصول الله يعز لحكام و صافي
خالتي الضاوية