#عمي_بوجمعة راه يمر بواحد المرحلة 

ديال الملل مالقى مايدير و حتى المستوى الفكري لمدام #الضاوية مابقاش يسمحلها انها تناقشو . هدرة جوج تقول شوف انت فين و انا فين يبانلك الفرق يا مسكين . الله يرحم لقبر و ما خلا . 

#ضاويتي هاذ الايام ولات مبلية بالذكاء الاصطناعي غي هدرة جوج تقولك نشوف شات جيپيتي واشتا يقول . ستنا نسول جيميناي و الرأي ديالو .

المشكل الضاوية الغالية مامخدماش جيميناي مسكين فشي حاجة مفيدة واللي تقدر تنفع البشرية ، و انما مستعملاه فشي حوايج لا علاقة . دخلنا عليكم بالله و اش ايلا غي مالقات ماتدير تنوض تمرمط فيه مسكين . لا و حتى هو عاطيها الخاطر و يجاوبها مسكين و مين ينوض يهدر معاها يهدر بنيتو ، يا ودي يا خويا جيميناي ولا شات جيبتي كومن كانت فيك الفايدة كون بلغت على الضاوية بتهمة ازعاج السلطات و لا ازعاج الاجانب ولا ترويع السلم و الامن العالمي . اهر ما دارت طرحت عليه سؤال فلسفي عميق : قطعة ارضية طولها 100 متر و عرضها 200 متر فكم عمر الفلاح جيميناي بجالاة قدرو اللي هو ذكاء اصطناعي تلفتو معاها مالقا مايقول من غير : حسبي الله و نعم الوكيل عليك يا الضاوية و هو طفى .

في الحقيقة راه كاين شلا ضاويات فالواقع ماشي فالمواقع، من تدخل تضرب دورة فوسائل التواصل الاجتماعي تلقى خير ربي كوارث و اللي تبقى تشوف و فالتالي تمشي تنعس و انت تحوقل و تدعي من قلبك باش ربي يرفع مقتو و غضبو علينا و يهني المجتمع من هاذ الكائنات الهلامية و اللي فين ما مشيت تلقاهم . نفاق موجودون كذوب هوما اللوالا ، تطبال في المقدمة ، تبلحيس الزعامة المهم منين ما تدور موجودين و لكن الفايدة ربي يجيب و يقتلك مين يكتب على محاربة الفساد و كشف المفسدين ،راه الفساد بذاتو ولا يطلب الشريعة منهم . مابقالو والو حتى هو يدير منشور يا انتوما با انا فالارض لا تسعنا نحن الاثنين .

خلاصة القول مادام كاين هاذ النوعية في مجتمعنا راه ولا حمارنا لا طلع القعبة و غادي نبقاو في بلاصتنا .

المهم ضاويتي الغالية ربي يتولاها و يسملها بواشتا راها تدير فشات جيبيتي و جيميناي و هاذ لكمامر وكلنا عليهم مولانا و صافي. الحاصول راه خلاها سي لحمار : غي زيد الثقل مانايضش مانايضش .

#عمي_بوجمعة

The post قالها الحمار : مانايضش مانايضش غي زيد اللي بغيت appeared first on داوي خاوي .

و مالنا حنا زعما باش فايتينا گاع هاذو اللي راهم كاينين فالساحة ؟؟؟

الهدرة اللولة قالي واش كاين شي حاجة سميتها ماصو مغنية فاليابان؟قلتلو و كاين شي حاجة سميتها المدينة الذكية فالمغرب؟؟؟ فبهت الذي طبل للمسؤولين .

المشكل مع الشعب اللي عندو المخ فيه البطون انك صعيب تحيدلو الدراگيات اللي دايرهم على عينيه . و ساهل تندهو بحال حمار الشيخ اللي وقف في العقبة .

المشكل هاذ الصديق اللي جا ينتاقدني على ماصو مغنية باليابانية هو نفسو مقتانع باللي بركان مدينة ذكية ، و كيما بركان ولات مدينة ذكية و هي گاع مزبلة و محفرة و الاشغال ديالها مابغاتش تكمل راه حتى مغنية يابانية و نزيدك من الشعر بيت سميتها مغنية اوزوماكي ايوا حيدهالي من الفم ياله ؟؟؟؟

صديقي #العربي من كثرة الاقتناع ديالو بالفكرة ديالو حاول انه يقنعني ان بركان كانت في بلاصة و رجعت فبلاصة اخرى من خلال المشاريع العملاقة اللي نطالقت فيها ولا ادل على ذلك الشركة العالمية ديال التنمية المحلية واللي غيرت وجه المدينة من الى و السلام عليكم . كي تدير تقنعو بشي حاجة عندو مسلمة من المسلمات . هو يقول و انا نقول و فالتالي ختمتهالو بالمقولة ديال #الجيلالي_جاليليو :” ومع ذلك فهي غارقة و ماتزيدش تناقشني و السلام

#عمي_بوجمعة

The post قالها الجيلالي : بركان مدينة ذكية.. ومع ذلك فهي غارقة! appeared first on داوي خاوي .

مين درت جلسة مع راسي و بدينا فالجدل البيزنطي حول الاسباب الكامنة وراء انني حتى بغيت ننعس عاد قالي راسي نوض تكتب بحال داك اللي ضربو حمار الليل تما عاد عرفت باللي حنا شعب عندو ازدواجية الشخصية و النفاق متأصل فينا.

تلاقيت واحد الراس يقولي يا ودي نوض تنعس غدا راك مبكر وعندك الخدمة و اوحد الراس يقولي لا عنداك تنعس قبل ماتفرغ داك الشي اللي فقلبك و تقول داك الشي اللي راك باغي تقولو، بقيت نشوف فيهم بجوج و تلاقيت ايلا نعست غادي نبات مديرونجي و يالا قلت داك اللي راني باغي نقول غادي حتى شي نهار نلقا راسي فحبيبيس ناكل عديديس.

#ضاويتي الغالية مدة و هي ضاربة سكتة ربانية مابقيتش شايفها تدور فوسائل التواصل الاجتماعي حتى دخلني الشك واش باقية حية ولا لقات مولاها. مشكلة #الضاوية انها عندها خير ربي وجوه و ماتعرف مين تشدها. مين يوقف الشهر و تشوف الخلصة السطوري اللول اللي تنشرو هي “ربي احفظ لي زوجي قرة عيني” يكمل الصالير تبقى تمعني و تضرب بلكلاشات بحال ايلا انا هو عدو المرأة الوحيد و الاوحد.

ضاويتي مليت حافظها و عاجنها زعما راه عشرة سنين هاذي و عجينة يدي. شفت حتى عييت قلت اللهم ندير شي براكا و ننعس و انا خاطري مرتاح. علاش زعما واحد العدد ديال المنادلين و اللي غي البارح و هوما فارعين لينا الراس بكشف الفساد و محاربة اهدار المال العام ضاربين الطم و ساكتين على واشتا واقعة في هاذ لمدينة الكئيبة؟؟؟؟ علاش زعما ماتنوضش فيهم النخوة و الحماس و ينوضو يهدرو و يضربو فالطوابل و يفتحو نقاش جدي على الوضعية اللي وصلتلها لمدينة؟ ولا مازال تحركهم التيليكوموند؟

و هنا اتذكر جيدا مقولة الحكيم الروسي بوجمعاتوف حين قال في كتابه الشهير “كيف تغمس في بركان”:

“يا لعرب مالكو سكتو، واش بالتيليكوموند تحركتو و لا بسباب المرقة بردتو”

و كما قال المعلق العماني: هنا سأسكت قليلا، نجبد عليا الكاشة و نجبد عليها حتى لغدا. وكل مرقة و انتم.

#عمي_بوجمعة

The post ماصو مغنية يبني الصباح يهدم لعشية appeared first on داوي خاوي .

The post مدير فالظلام و الصالير فالتمام appeared first on داوي خاوي .

.#عمي_بوجمعة

The post كي نديرلك يا گوبة وجهي ايلا حكيتك سال دمي و ايلا خليتك طال همي appeared first on داوي خاوي .

#عمي_بوجمعة من دون جميع الدراسات العلمية و جميع الاطروحات الشعبوية الضاوية ماصاب غي رضا الطالياني يستشهد بلكلام ديالو. المشكل ماشي فالكلمات المشكل انها كلمات على صواب و لخصت الواقع اللي عايشينو سوا هنا سوا فجزيرة #الشاكرباكربن او شي جزيرة من الجزر اللي نعم علينا سيدي ربي بيها حتى ولات كلشي كيف كيف و مع كامل الاسف نهار تنوض تهدر تولي ماتسواش و تولي فيك شي تهم قدها منقداش. 

ماشي هذا هو موضوعنا واخا هو صلب الموضوع انما #بوجمعة العزيز مابغاش يصرح بيها مباشرة و يقول اللي فقلبو حيث ايلا هدر غادي يبدا يتفلسف و ماغادي تستافدو من هظرتي حتى شي فايدة .

بوجمعة هاذ ليامات كاعي و ماعالم بيه غي اللي خلقو واخا مرة مرة يبدا يدخل و يخرج فالهدرة بحال ايلا هاز هم الدنيا و الدين على كتافو و بحال ايلا #جدي_قدور خلا ليه جزيرة الشاكرباكربن في الملكية الخاصة بيه. و راه خلاها السي لحمار ” غي زيد راه مانايضش مانايضش ” هاذ المثل يصدق على جزيرتنا العزيزة و عطاها ربي شي حكام واحد الثلاثي مانقولكمش الحاكم الاعلى و الحاكم العام و الحاكم بينهما ، قالك اسيدي تفتقت العبقرية عندهم على انشاء واحد الشركة اللي هي مجموعة شركات بحال داك الشكل ديال مجموعة شركات غي هو مين تمشي تقلب تلقاها شركة وحدة بصح عندها خير ربي سموات و كل شركة فيها خير ربي مادرية (مدراء) و دوك لمادرية يحكمو فخير ربي مادرية اخرين و زيد عليهم بزااااف ديال المسؤولين باش فالتالي يسيرو شي خدامة و النتيجة كيما قالو لعرب لقدام وقف حمار الشيخ في العقبة.

#بوجمعة و اللي ديما سلبي فالحياة ديالو هاذ المرة عبر على الغضب كيفاش زعما جزيرة قدها قداش و اللي خرجو منها زعماء و وزراء و مفكرين و اطر اللي شادة التسيير ظيال ادارات قد لخلا فشلت انها تخرج اطر و مادرية يسيرو شركة زعما وصلنا لواحد الدرجة ولينا نديرو الاستيراد ديال الاطر من خارج لمدينة بحال ايلا لمدينة عݣرت انها تولد اطر؟؟ ولا القضية فيها همزة و هوتة و جابها ربي ارا نتبرعو و نبرعو حبابنا . راه خلاوها سيادنا اللاولا اللهم ارحمني و ارحم واليديا. 

يا ودي يا #عمي_بوجمعة جيبها من لخر و قول لينا واشتا كاين وبلا فلسفة. الحاصول صدق الشاعر الكبير حين قال ” لعظم اللي ماتكددو لخوك ودو ” #الضاوية

The post يقول العلامة رضا الطالياني “خبز الدار ياكلو البراني و هاذي حالة اللي ݣليل “ appeared first on داوي خاوي .

و نهجو ذا الزمان بغير عيب و لو نطق الزمان لنا هجانا

والله العظيم ايلا بعض المرات الواحد تتلفلو مع المورو كحل الراس  تبغي تعبر على الرأي ديالك تجاه القضايا الانية او السابقة تتلفلك فالتالي تولي تشد لرض و تقول الحمد لله الذي سخر لنا هذا و ما كنا له مقرنين. مين الواحد يقرا هاذ الابيات الشعرية ديال الشافعي الله يرحمو يقول سبحان الله العظيم .

المشكل حنا ديما هاك نعيبو  الناس و نسبو الدنيا و ما يجي بها بحال ايلا حنا ملايكة و مانغلطوش  .حميدة تيت_سويت من هاذ الكاليتي اللي دايرة هاكا  فين ما مشا تلقاه  يشارك بالرأي ديالو واخا غالط واخا  المهم هو ما يغلطش ديما على صواب و ديما الرأي ديالو صادق و نيشان واخا يكون مانعرفت شنو المهم هو على حق. حميدة  فتح الله عليه شوية مشا دار السياحة فأوروبا و رع للبلاد و بحال ايلا السيد عمرو عاش في  هاذ لبلاد السعيدة _  يا ربي تغفرلي هاذ الكذبة ديال لبلاد السعيدة _  و ا السيد مشا يومين رجع واحد اخر غي هدرة جوج يقولك لهيه  شي نو لابا لابا شي نو بشااااااااخ يا لالمان . و السيد ولا ميركل فلبلاص ، الاشكالية الهدرة فشي شكل و التصرفات فشكل  السيد تلاقا الطارويات ديال الزبل  موسخين و القضية عادية راه ماشي شي كارثة انسانية  ولا تشيرنوبيل وقعت وحنا لا خبار راه غي البيديويات ديال الصليح موسخين. السيد نوض قربالة ها الفساد ها المحسوبية ها الامبريالية ها مانعرفت شو و راه مابقا والو و يقولك نظرية المؤامرة و الماسونية العاليمة . و هاذ الشي كامل على انه تلاقى طارويات ديال الزبل موسخين. الكارثة ان العقلية هي اللي باقية موسخة داك الشي علاش البيديويات باقيين موسخين نهار تتبدل العقلية كلشي يتنقى و يويلي يشعل بالنقاوة. حميدة من كثرة الانتقاد و النقد ديالو و من كثرة التأثر ديالو ببلاد النصارة و لا لهيه كيما يسميها  هز معاه شكارة ديال الزبل  غادي يرميها فالبيدو  الكارثة العظمى دياير موراه طريق ديال الما موراه  و فالتالي رماها برا للبيدو و رجع للدار واخا البيديو خاوي. و في الاخير عاد ليقول هاذ لبلاد و الله عمرها لا تنقات  و لا وصلت بحال بلاد النصارى. 

سبحان الذي سخر لنا البغال و الحمير لنركبوها ماشي لنناقشوها .

The post شي نو لابا appeared first on داوي خاوي .

متبعة الاحداث ولات بحال شي خبير استراتيجي كل راسمالها هدرة فهدرة . من كثرة ما ولات متبعة الفايس بوك زوكربرغ اللي مخرج الفايس بوك والله يا يماه لا قد الضاوية واخا هو اللي مخرج هاذ لعجب . الضاوية و المجتمع الضاوي اللي دايرين شهادة السكنى فالفايس بوك  و سناب شات و انستغرام و يوتوب تلقاهم فالحين فشلا حوايج اولها انهم رجعو محلحلين بالقوة حيث ماشي حيث فاهمين لفهامة اللي على حقها و طريقها انما دافعين الجبهة بشكل غير متوقع. الاشكالية لكبيرة عندنا في مجتمعنا العربي اننا نتأثر بسهولة و يتم تشكيل رأينا بسهولة كبيرة و دون عناء. فيسع نتأثرو و فيسع يشكلو لينا فالرأي ديالنا كي بغاو وحتى واحد مايقدر يقول شي حاجة و تلقانا تابعينهم كي القطيع.و شحال من وتحد يظل نهار كامل و هو يسب و يعاير فشي حوايج و فالتالي تلقاه متبعهم و حال الفم فيهم  و يجي يعرض عليك الفية ابن مالك فالاخلاق و سبحان الله أ الريف و الرجوع لله . المشكل تلقى خير ربي حوايج دازو و حنا حالينا الفم و قابضين فنظرية المؤامرة و الرجوع لله يا سي البشير اشمن مؤامرة و اشمن زميطة شكون انت يا بو حباكة اللي غادي تنوض ميريكان بجلالة قدرها و تديرلك لحساب و تفكر باش تقضي عليك. حنا لعرب و المورو كحل الراس ايلا بغات تقضي علينا ساهل حالنا روتيني اليومي و ها حنا مبوقين و حالين الفم و مين تضربناالفيقةتكون البقرة ضربت و لعجل داه مولاه . بقينا حاضيين #حمزة_مون_بيبي و دنيا باطما و مين ضربتنا الفيقة لقينا الناس باعت وشرات فينا و حنا لاخبار . الناس مين دارت هاذ وسائل التواصل الاجتماعي دارتها باش الناس تتبادل الاراء و الافكار ماشي باش شي يفضح شي و شي يصور شي عريان و الناس ديال #روتيني_اليومي يدخلو للطوندونس . سبحال الله اي حاجة تخرج فالعالم تكون غادية مزيان هي توصل لعندنا نحن #شعب_الله_المحتار 《ماشي شعب الله المختار باش نكونو متفاهمين 》 و تتبهدل بحال ايلا قايسنا فيروس سميتو #فيروس_غي_بهدلونا . الحاصول اللي هداه الله مايوليش محلحل على الفايسبوك ولا يوتوب يخلي داك الشي بينو و بين راسو . اللي بلاه ربي بشي بلية يستر راسو و الله يعفو عليه .  بقاو تابعين #حمزة_مون_بيبي و الناس دارت عامرة فخاوية و جمعو و طواو مع فلسطين و القدس و خلاو الفلسطينين على الدص .#عمي_بوجمعة 

The post فيروس غي بهدلونا ماعليش appeared first on داوي خاوي .